Umukino wa nyuma w’Igikombe cy’Amahoro hagati y’ikipea ya Rayon Sports na APR FC wakerereweho iminota 21 nyuma y’uko amakipe yombi ananiwe kumvikana aho abasimbura bagomba kwicara.
Habura iminota itanu ngo Saa Cyenda zigere, abakinnyi b’abasimbura ba APR FC n’aba Rayon Sports, bisanze bicaranye ku ntebe imwe, habura uruhande rumwe rwemera kubererekera urundi ngo buri rwose rufate intebe yarwo.
Ni icyemezo cyaganiriwe n’impande zombi bituma havuka igisa no kutumvikana mbere y’uko amakipe yinjira mu kibuga. Abayobozi batandukanye bagerageje kumvikanisha impande zombi, ariko biranga biba iby’ubusa.
Intandaro yabaye ko abakinnyi ba APR FC bagiye kwicara mu myanya yari yateguriwe abasimbura ba Rayon Sports. Amakuru avuga ko Rayon Sports yavugaga ko aho igomba kujya kwicara ari naho yicaye ubushize ubwo yakiriraga umukino uheruka kuri iki kibuga kuko ariyo yabazwe nk’iyakiriye uyu mukino wa nyuma.
Byakomeje impaka ziba nyinshi bigera n’aho Rayon Sports ivuga ko idashobora guhindura ibyicaro kuko yari kuba yicaye imbere y’abafana ba Rayon Sports. Nyuma y’ibiganiro, APR FC yemeye kubererekera Rayon Sports ijya kwicara.
