Mu gitondo cyo kuri uyu wa Gatatu tariki 15 Ugushyingo 2023, uwitwa NDAGIJIMANA Christophe w’imyaka 37 akaba umwe mu barinda Pariki y’Igihugu y’Ibirunga , yarashe mugenzi we witwa Irakoze Kevin w’imyaka 32.
Ibi byabereye mu Murenge wa Jenda, Akarere ka Nyabihu nk’uko iyi nkuru dukesha Kigali Today ivuga.
Umuyobozi wa Pariki y’Igihugu y’Ibirunga, Uwingeri Prosper, yemeje ayo makuru, avuga ko ushinjwa kurasa mugenzi we yafashwe mu gitondo cyo kuri uyu wa Kane, itariki 16 Ugushyingo 2023.
Ati “Byabaye ejo, icyo twe dukora ni ugutanga amakuru ko umuntu yapfuye, hanyuma inzego zibishinzwe zigakurikirana icyaha, ayo makuru yo ni yo, uwishe yamaze gufatirwa mu Murenge wa Mudende, bamufashe muri iki gitondo, avuka mu Murenge wa Gataraga mu Karere ka Musanze”.
Yongeyeho ko “Uwarashe mugenzi we n’uwarashwe ntabwo ari abakozi ba RDB, bombi ni abakozi b’ikigo cya Karisoke, andi makuru kuri ibyo ni bo bayamenya”.
Icyateye uwo mugabo kurasa mugenzi we nticyahise kimenyekana mu gihe umurambo wa nyakwigendera wajyanwe mu buruhukiro bw’Ibitaro bya Ruhengeri.
