Urwego rw’Igihugu rw’Ubugenzacyaha RIB rwemeje ko rwatangiye iperereza ku bakekwaho kwiba telefone ya The Ben iherutse kuburira i Bujumbura mu Burundi.
Umuvugizi wa RIB, Dr. Murangira B. Thierry yabwiye IGIHE ko dosiye y’abibye telefone ya The Ben ikiri gukorwaho iperereza ku buryo nta makuru menshi yayitangaho.
Ati “Ni benshi turi gukoraho iperereza, nta byinshi nabivugaho. Icyo mwamenya ni uko tukiri mu iperereza.”
Ku rundi ruhande amakuru ahari avuga ko Ndagijimana Eric benshi nka X-Dealer yamaze gutabwa muri yombi kimwe n’abandi bakiri gukorwaho iperereza.
Amakuru avuga ko nyuma yo kubura telefone ya The Ben, uyu muhanzi yaje gutanga ikirego muri RIB nayo mu gukora iperereza iza gusanga telefone yibiwe i Bujumbura yaraje kwakirizwa i Gitega mu Karere ka Nyarugenge, aho uyu X-Dealer asanzwe atuye.
Ibi byahuriranye n’uko uyu musore nyuma y’uko telefone ibuze yaratashye shishi itabona cyane ko atanakurikiye igitaramo cya kabiri cya The Ben.
Telefone ya The Ben yibwe ku wa 30 Nzeri 2023, ku wa 1 Ukwakira 2023 ntabwo uyu X-Dealer yigeze areba igitaramo ahubwo iryo joro yashatse uko ataha ku buryo ku wa 2 Ukwakira 2023 mu gitondo cya kare yari yambutse umupaka.
Uyu musore yari yagarutsweho mu makuru y’igitaramo cya VIP The Ben yakoreye i Bujumbura kuko ari we wakubiswe urushyi na Muyoboke Alex amuhoye kuba yarakekwagaho gucuruza amatike mu buryo bunyuranyije n’amategeko.
Si telefone ya The Ben yibiwe i Bujumbura gusa kuko n’iya Uncle Austin yibwe mu gitaramo cyo ku wa 1 Ukwakira 2023.
