Group Sex! Iri jambo si irya none ku Isi gusa mu Rwanda rikoreshwa na bake ndetse ritangiye kwamamara mu myaka itari myinshi cyane ishize.
Kuri wowe ushobora kuba ari ubwa mbere uryumvise mu matwi yawe byanga bikunze nzi ko ukurikije uko uribona, wamaze gutekereza ko hari aho rihuriye n’imibonano mpuzabitsina, kandi niba ari byo watekereje nta kabuza uri mu kuri.
Ababasha gucukumbura kuri internet bo bazi iri jambo kuko rikunze gukoreshwa na bamwe mu buryo bumwe cyangwa ubundi, bitewe n’ingingo bari kuganiraho cyangwa n’igihugu kuko buri gahugu kagira umuco wako!
Iri jambo ryaturutse hakurya y’amazi ryambutse inyanja cyane ko Isi yabaye umudugudu, ubu bamwe mu Banya-Kigali barizi nk’aho ari bo barizanye.
Niwumva iri jambo ntugire ngo ibyaryo biherera mu kuvuga gusa kuko ari byo ubu naba narangije kubisobanura kare nafashe iyindi paji! Muri make ni ijambo ritwikiriye byinshi.
Reka tuve mu magambo, ubundi uretse kubyita ‘Group Sex’ abandi bakunze kuvuga ‘Group Sex’ bitewe n’ikiboroheye.
Mu buzima busanzwe tuzi ko abantu bakorana imibonano mpuzabitsina ari babiri gusa, n’ubwo hari na “Threesome” aho abantu batatu bafite ibitsina bitandukanye cyangwa babihuje na bo bashobora kwiha akabyizi; ibi nabyo si ibya none ku Isi ndetse na hano i Kigali nta nkuru ikibirimo kuko bikorwa kenshi mu biganjemo urubyiruko.
Ibi si byo byanzinduye uyu munsi ahubwo ndagira ngo uze kumva ‘Group Sex’ neza. Iyi ni imibonano mpuzabitsina iba hagati y’igikundi cy’abantu benshi barenze batatu bashobora guhurira mu birori runaka cyangwa ahantu runaka bapanze rugahana inkoyoyo!
Aha umuntu ashobora gusambana n’abantu atazi umubare bitewe n’abahari, ibyo kumenya amazina byo biba bigoye kurushaho cyane ko hari n’ababa bahuye bwa mbere.
Ibya ‘Group Sex’ i Kigali bireze! Mu birori bitandukanye bibera mu nyubako ziberamo ibirori bimwe na bimwe bihuza urubyiruko yaba uruhuje ibitsina cyangwa urutabihuje.
Aha abahisemo guhura gutyo akenshi babanza kwitereka amayoga n’ibindi bishobora gutuma ‘high’ ziba nyinshi! Ubundi nyuma sinakubwira. Mu ndirimbo Davis D yahuriyemo na Bulldogg na Bushali bise “Bermuda’’ humvikanamo umukobwa baba baririmba bavuga ko ashaka ‘Gang Bang’ bivuze ko ari ibintu bisigaye byeze mu rubyiruko.
Hari ibyo ntavuga bibera muri ibi birori gusa na we nyine ibaze urubyiruko rwahuye rufite umugambi nk’uwo, tekereza ko ibishoboka byose bumva ko byabashimisha byerekeye imibonano mpuzabitsina bikorwa.
Akenshi iyo uganiriye n’urubyiruko rwinshi muri iki gihe usanga bakubwira ko nta birenze.
Ubu gusambana byarasigirijwe bamwe basigaye babyita ‘Gukora sex’ kandi muri iki gihe byabaye nko gusuhuzanya mu ntoki kuko hari n’abatagitinya kubikorera ku karubanda nko mu bwiherero rusange n’ahandi abantu bashobora kwihengeka bakiha ako kabyizi.
Ngira ngo abakurikira imbuga nkoranyambaga muri iyi minsi babonye amashusho y’Umugandekazi Christine Nampeera n’umukunzi we bahanishije mu bwiherero bari gukora imibonano mpuzabitsina ntacyo bikanga. N’ubwo ibi byabaye mu baturanyi no mu Rwanda biraba cyane.
Uwashaka kumpinyuza yakongera agaterera akajisho ku mashusho yakwirakwiye ku mbuga nkoranyambaga mu 2021 y’umusore n’inkumi bari muri piscine kabaye!
Aha ni ho wahera wumva ko noneho gupanga abasore bagatumira inkumi ahantu runaka bari kumwe bonyine byaba byoroshye ‘guhuza’ nk’uko babyita mu kinyarwanda cy’ubu.
Umwe mu bakobwa batunguwe na ‘Group Sex’ waganiriye na IGIHE yavuze ko uburyo yabibonyemo buteye inkeke. Ati “Njye nabigiyemo ntazi ibyo ari byo. Hari abasore babiganiriyeho n’indi nkumi isanzwe ari inshuti yanjye barabipanga tujyanayo ariko we azi gahunda we na bagenzi be bari bafite, ku buryo icyo gihe yagiye nta n’umwambaro w’imbere yambaye.’’
“Twagezeyo dutangira kunywa inzoga, turabyina nyuma abasore bamwe n’inkumi mbona batangiye ibyabo wa mugenzi wanjye akajya ancira amarenga ngo nirekure mfate abandi bana neza, mbona kuryamana n’abasore barenze umwe bari aho ntabivamo nsohoka nkugiye kunywa agatabi [kandi ubundi ntasanzwe mbikora] ngenda ngiye.’’
Yavuze ko ari ubwa mbere yari abonye basambana ari igikundi umusore umwe ava ku nkumi imwe ajya ku yindi gutyo gutyo, ibintu yagereranyije no kugera i kuzimu.
Yakomeje ati “Ni ibintu byantunguye ariko na none nibaza ukuntu ibyo twita ubusirimu cyangwa tuvana mu mico y’ahandi bishobora kuzatworeka.’’
Abasanzwe bakora ibi bo iyo muganiriye bakumva watangaye baraseka bagakwenkwenuka, bakagufata nk’utazi aho Isi igeze.
Hari umusore umwe twaganiriye umaze kwisanga muri ibi bikundi wavuze ko ‘nta birenze’ kuko ‘gukora sex’ bisigaye ari ibintu bisanzwe kandi n’abakobwa batakigorana nka kera ku buryo umubwiye ko aza kugusura ari kumwe na bagenzi be ariko ukamusaba ko baza kwirekura kuko bari bukore ‘Group Sex’ akubwira ko nta ribi.
Hari n’abavuga ko bamwe mu rubyiruko bisanga muri ibi bikorwa nk’ibi kuko nta kazi. Umukobwa umwe ati “Njye mbijyamo bwa mbere byatewe n’inshuti yanjye yantumiye ariko imbwira ko turi bukore Group Sex, nabifashe nk’ibintu byoroshye ariko bwa mbere byabanje kungora […] icyo gihe n’ubundi nta kazi nari mfite rero nabonye ‘plot’ [ahantu ho kujya] nanga kuyitesha ndemera, nyuma nza kubimenyera mbifata nk’ibisanzwe.’’
Ikigo cy’Igihugu gishinzwe Ubuzima, RBC, giheruka kugaragaza ko ubwandu bushya bwinshi buri kwiganza cyane mu rubyiruko aho nibura abakobwa bafite kugeza ku myaka 24 bafite ibyago byinshi byo kwandura.
RBC yagaragaje ko mu Rwanda nibura 35% y’ubwandu bushya buri mu rubyiruko ruri hagati y’imyaka 15 kugeza kuri 21. Ibi nabyo bikaba biri mu bishobora gutizwa umurindi n’ibikorwa nk’ibi bya ‘Group Sex’ cyane ko n’ubwo bamwe bashobora kubikora bikingiye umubare munini w’ababikora usanga badakoresha agakingirizo.
Bityo urubyiruko rukaba rusabwa kwitwararika kugira ngo ahazaza h’igihugu hatazaba habi kuko ari bo Rwanda rw’ejo.
Inkuru dukesha Igihe.com
