Alliah Cool akomeje imyiteguro yo kumurika filime ye nshya ‘Good book bad cover’ yitegura gushyira hanze, icyakora agace gato k’iyi filime yasohoye gakomeje kuvugisha abatari bake kubera aho bakinnye bari gukora imibonano mpuzabitsina.
Nyuma y’uko Alliah Cool asohoye agace gato ka filime ye, ikintu cyagarutsweho cyane ni amashusho ayigaragaramo y’umukobwa uri gukora imibonano mpuzabitsina.
Ni amashusho yagarutsweho cyane ku mbuga nkoranyambaga, bituma dushaka kuganira n’uyu mukobwa Alice la boss, umunyamideli winjiye muri sinema ahereye kuri iyi filime.
Alice la boss mu kiganiro cyihariye na IGIHE yagize ati “Nta kibazo byigeze bintera kuko ni ibintu bisanzwe, nibaza ko umuntu wese uzi ubwenge atabifata nkaho twari turi gukora imibonano mpuzabitsina kuko ntabwo byabera hariya.”
Uyu mukobwa avuga ko uretse ibyo bakinnye mu rwego rwo kugaragaza igitekerezo cyari cyanditse muri filime, ariko mu byukuri batari bukore ibyo benshi bavuze imbere ya camera n’abantu bari mu ifatwa ry’iyi filime.
Alice la boss yavuze ko uretse ku mbuga nkoranyambaga abantu be ba hafi batigeze bamubaza byinshi.
Ati “Erega abantu benshi bazi neza ko bitakunda gukora biriya mu ifatwa rya filime.”
Muri iyi filime Alice la boss ahabwa inshingano zo kugerageza uba asanzwe ari umugabo wa Alliah Cool ngo barebe ko yakwemera kumuca inyuma, ibi yarabikoze birangira baryamanye.
Ni ibintu byababaje cyane Alliah Cool bimutera ibibazo mu rugo ndetse atangira guhangana bikomeye hagati ye na Alice la boss, umukobwa wari wahawe akazi ko kureshya umugabo we.
Alice la boss asanzwe ari umushabitsi ufite na sosiyete yise Axis Logistics akaba n’umunyamideli uri mu cyiciro cy’ababyibushye.
Iyi filime nshya ya Alliah Cool igiye kujya hanze ikurikira iyo yise ‘Alliah The Movie’ yasohotse mu mpera za 2021 ndetse ikazasohoka mu gihe hagitegerejwe indi yitwa ‘Accidental Vacation’ yahuriyemo n’abakinnyi bakomeye by’umwihariko muri Nigeria.
Ni filime mpuzamahanga uyu mugore avuga ko azamurika mu minsi iri imbere cyane ko imirimo yo kuyitunganya yose iri kugana ku musozo.
