Polisi mu karere ka Kamonyi kuri uyu wa Gatandatu yarashe mu cyico umusore witwa Ndahimana Alexis wakekwagaho kwica anize umukecuru witwa Mukarusi Rosalie.
Ndahimana w’imyaka 29 y’amavuko yarasiwe mu muduguru wa Kigarama, akagari ka Remera ho mu murenge wa Rukoma.
Amakuru y’iraswa rye yemejwe n’Umunyamabanga Nshingwabikorwa w’Umurenge wa Rukoma, Mandela Innocent. Amakuru avuga ko uyu musore yarashwe ubwo yashakaga gucika Polisi yari yamujyanye aho yakekwagaho kwicira uriya mukecuru.
Gitifu wa Rukoma avuga ko uwarashwe yari yarigeze gukora mu rugo rwa Nyakwigendera Rozariya, akaba ariwe wakekwagaho kumwica.
Uyu muyobozi yavuze ko nyuma y’urupfu rwa Mukarusi wari ufite imyaka 69 y’amavuko inzego z’umutekano zakomeje gukora iperereza zishakisha abagize uruhare mu rupfu rwe, birangira hatawe muri yombi abarimo Nahimana wemeraga ko ari we wamwishe.
Amakuru avuga ko uyu musore mbere yo kwica uriya mukecuru yabanje kumwiba Frw 200,000 ndetse n’ibishyimbo yari yagiye kwerekana aho yahishe mbere y’uko araswa.
