Abana babiri bo Murenge wa Nyabirasi mu Karere ka Rutsiro, bapfuye nyuma yo kurya imyambati, bagenzi babo babiri bo bakaba barembeye kwa muganga.
Aba bana bapfuye ku wa Gatandatu tariki ya 23 Nzeri 2023, nyuma y’uko bariye imyumbati ya Gitaminsi. Bagenzi babo barembye, umwe arwariye mu Kigo nderabuzima cya Nyabirasi, mu gihe undi arembeye mu bitaro bya Gisenyi.
Umunyamabanga Nshingwabikorwa w’Umurenge wa Nyabirasi w’agateganyo, Tegamaso Patience, yemeje iby’urupfu rw’aba bana.
Yagize ati “Abana babiri bitabye Imana abandi barimo kwitabwaho kwa muganga, harakekwa imyumbati ya Gitaminsi bagaburiwe n’umuturanyi.”
Yongeyeho ko uyu mubyeyi wabagaburiye iyo myumbati ya gitaminsi nta wundi mutima mubi yari afite kubera ko bayisangiye n’abana be.
