Orville Richard Burrell wamenyekanye nka Shaggy, umwe mu bahanzi bafite amateka akomeye muri muzika, yahishuye inzira yamuhuje na Bruce Melodie nyuma yo kumva indirimbo “Funga Macho” akanyurwa n’imiririmbire ye.
Uyu munyabigwi muri muzika mu kiganiro yagiranye na Bruce Melodie, yavuze ko bwa mbere yumva iyi ndirimbo yanyuzwe n’ijwi rya Bruce Melodie ndetse n’uko iyi ndirimbo ikoze.
Ati “Mbere na mbere reka ngushimire Bruce, kuri iki gihangano kidasanzwe wahanze, When She’s Around yakomotse kuri Funga Macho, umunota wa mbere nyumva , ijwi ryawe n’imiririmbire yayo byarankuruye, umuvandimwe wanjye Steve yarayicuranze ndavuga nti iki ni ikintu cyihariye.”
“Imicurangire yayo numva ari indirimbo ikora ku mitima y’abantu, bwa mbere nyumva numvise ari indirimbo yuzuye umunezero ni igihangano gishobora gutuma umuntu yishima iyo acyumvise.”
Shaggy yakomeje avuga ko iyi ndirimbo ari imwe mu zishobora gutuma umuntu agira umunezero aramutse ayumvise cyane ko abantu bakeneye kumva ibintu bituma banezerwa muri iki gihe kuruta ibibashengura umutima nk’intambara ziri hirya no hino ku Isi.
Shaggy yashimiye Bruce Melodie wamwemereye ko basubiramo iyi ndirimbo.
Ati “Ndishimye, nishimiye ko wanyemereye kugira uruhare muri iki gihangano cyiza, ndagushimiye wakoze ikintu cyiza cyane.”
Shaggy yavuze ko mu bikorwa bye bya muzika ahora atekereza ku bahanzi bashya kandi bafite impano n’umwihariko kandi Bruce Melodie nawe ari muri abo.
Ibi yabivuze agaruka kuri Rick Rock bakoranye indirimbo “Wasn’t Me”, Rayvon bakoranye “Angel”, Mohombi bakoranye “I need your Love” na Spice bakoranye indirimbo zirimo “Bad Girl” na “Go Down Deh”.
Ati “Buri gihe mpora ndeba abahanzi bato kandi bafite amajwi adasanzwe n’ibikorwa byihariye, uri umuvandimwe wanjye ibyo byose urabyujuje, uburyo utwara ijwi ryawe , ntibisanzwe.”
Bruce Melodie avuga ari we wakagombye gushimira Shaggy wemeye kujya muri iyi ndirimbo dore ko yakuze ari umufana we kuva kera.
Ati “Ndi umufana wawe ukomeye, ahubwo ndatereza ni njye wakagombye kugushimira cyane kuba waremeye gukorana indirimbo nanjye.”
Shaggy yavuze ko igihe cyose Bruce Melodie azamukenera yiteguye kuzaba ahari ndetse ko yanyuzwe n’uburyo abanyarwanda bamwishimiye bwa mbere ahataramira mu 2008 yatumiwe na Sosiyete y’Itumanaho ya MTN.
Bwa mbere Bruce Melodie na Shaggy baririmbye iyi ndirimbo bise “When She is Around” bamaze ukwezi bateguza abakunzi babo ni mu birori bya Trace Awards byabaye ku wa 21 Ukwakira 2021 muri BK Arena.
Iyi ndirimbo basubiyemo yashibutse ku yitwa “Funga Macho” Bruce Melodie yashyize hanze mu mezi 11 ashize imaze gucurangwa inshuro zirenga miliyoni 3 kuri Youtube.
Bruce Melodie avuga ko Shaggy yumvise iyi ndirimbo akayikunda nyuma abantu bari hafi ye batangira ibiganiro bibahuza kugeza bayikoranye.
Mu kiganiro aherutse kugirana na Kiss FM yagize ati “Shaggy yarayikunze bansaba ko twayikorana, nta kintu kidasanzwe cyabaye mvuge ngo ni umushinga nateguye cyangwa bikaba ibintu nashakishije cyane ariko nyine byaziye igihe, ni ibintu byikoze umuziki ugira ukuntu ugenda.”
Orville Richard Burrell [Shaggy] w’imyaka 54 ni umuhanzi w’icyamamare ukomoka muri Jamaica .
Uyu mugabo bakunda kwita “Mr Love Lover” cyangwa “Mr. Boombastic” mu 1988 yinjiye muri ngabo za Leta Zunze ubumwe za Amerika zirwanira mu mazi ari muri batayo ya 5, indirimbo ye ya mbere yise ’Oh Carolina yasohotse mu 1993.
Amaze kwegukana Grammy Awards ebyiri.
